តម្រូវការកង់សកលលោកកើនខ្លាំងពេករហូតរោងចក្រផលិតមិនទាន់
Publié le 28 Juillet 2020
july 27,2020
AFP
កង់កំពុងរីកសាយពាសពេញពិភពលោកនៅពេលមនុស្សព្យាយាមជៀសវាងឡានក្រុង និងរថភ្លើង ដែលមានមនុស្សច្រើនកុះករសម្រាប់ការធ្វើដំណើរប្រចាំថ្ងៃរបស់ពួកគេ បន្ទាប់ពីមានជំងឺរាតត្បាតកូវីដ-១៩ ឬការធ្វើលំហាត់ប្រាណបន្ទាប់ពីនៅក្នុងផ្ទះអស់រយៈពេលជាច្រើនខែ។
ប៉ុន្តែជាមួយនឹងការលក់បានរីកដុះដាលនៅក្នុងប្រទេសជាច្រើន ការជិះកង់នាពេលបច្ចុប្បន្នបានធ្វើឱ្យក្រុមហ៊ុនផលិត និងអ្នកលក់រាយដាច់ឆ្ងាយពីតម្រូវការ។
សហព័ន្ធឧស្សាហកម្មកង់អឺរ៉ុប (CONEBI) បានប៉ាន់ស្មានថាមានចំនួន ៤៥ ទៅ ៥០ ភាគរយនៃគ្រឿងបន្លាស់សម្រាប់កង់ទាំងអស់ដែលលក់នៅអឺរ៉ុបត្រូវបាននាំចូលពីអាស៊ី។ យោងតាម CONEBI បានឱ្យដឹងថា កង់ និងកង់អេឡិចត្រូនិចចំនួន ៧.៣ លានត្រូវបាននាំចូលទៅអឺរ៉ុបកាលពីឆ្នាំមុន ដែលភាគច្រើនមកពីប្រទេសកម្ពុជា និងតៃវ៉ាន់។
នៅទីក្រុងប៉ារីស ជាកន្លែងដែលអភិបាលក្រុង Anne Hidalgo បានខិតខំប្រឹងប្រែងដើម្បីដាក់ការជិះកង់លើផែនទី ដែលបង្កើនចំនួនផ្លូវកង់យ៉ាងច្រើនក្នុងប៉ុន្មានឆ្នាំថ្មីៗនេះ អ្នកទិញជារឿយៗត្រូវរង់ចាំប៉ុន្មានសប្តាហ៍ដើម្បីទទួលបានកង់ម៉ាក់ថ្មីរបស់ពួកគេ។
លោក Federico Mosca អ្នកលក់រាយឯករាជ្យនៅប៉ារីសបាននិយាយថា៖ «រយៈពេល ៣ ឬ ៤ សប្តាហ៍នេះ ខ្ញុំមានអតិថិជនរាប់សិបនាក់កំពុងរង់ចាំ។ ហើយខ្ញុំត្រូវប្រគល់ប្រាក់ទៅឱ្យមនុស្សមួយចំនួនវិញ ពីព្រោះខ្ញុំមិនដឹងថាពេលណាទើបខ្ញុំមានកង់សម្រាប់ពួកគេទេ»។
អតិថិជនម្នាក់ ឈ្មោះនីកូឡា អាយុ ៣១ ឆ្នាំបាននិយាយថា គាត់បានទៅមើលហាងចំនួន ៨ ផ្សេងៗគ្នាមុនពេលមានសំណាង។
ហើយសូម្បីតែពេលនោះក៏ដោយ ក៏គាត់ត្រូវបានបង្ខំអោយដំឡើងថវិការបស់គាត់ ហើយទិញម៉ូដែលថ្លៃជាងការគ្រោងទុក ព្រោះកង់ដែលគាត់ចង់បានត្រូវបានលក់អស់។
គាត់ថា៖ «ខ្ញុំកំពុងស្វែងរកកង់ជាក់លាក់មួយ ហើយខ្ញុំបានទុកពេលមួយខែដើម្បីទិញវា ប៉ុន្តែវាមិនមាននៅកន្លែងណាទេ» ។
សង្វាក់ហាងលក់រាយ Decathlon ដែលឈានមុខគេបានអោយដឹងថា ខ្លួនក៏មានបញ្ជីរង់ចាំដែរ ប៉ុន្តែគេអាចកែលម្អកង់មួយទឹកសម្រាប់អតិថិជនដែលមិនអាចរងចាំបាន។
យោងតាមសហព័ន្ធកីឡា និងប្រណាំងកង់ បានឱ្យដឹងថា ការលក់កង់របស់បារាំងបានកើនឡើងទ្វេដងនៅក្នុងខែឧសភា និងមិថុនា បើប្រៀបធៀបនឹងខែដូចគ្នាកាលពីឆ្នាំមុន។
ការលក់កំពុងតែរីកដុះដាលនៅក្នុងប្រទេសភាគច្រើននៅជុំវិញពិភពលោក។
Decathlon បានគណនាថាជាទូទៅនៅទ្វីបអឺរ៉ុបការលក់បានកើនឡើងពីរ និងបីដង។ នៅក្នុងប្រទេសចិន តំរូវការបានកើនឡើងប្រាំដងចាប់តាំងពីការបិទប្រទេសមានការបន្ធូរបន្ថយ។ រីឯនៅសហរដ្ឋអាមេរិក ការលក់កង់បានផ្ទុះឡើង ដោយការទិញតាមអ៊ិនធើរណែតបានកើនឡើងយ៉ាងខ្លាំងនៅខែឧសភាចំនួន ៥ ០០០ ភាគរយបើប្រៀបធៀបទៅនឹងខែដូចគ្នាកាលពីឆ្នាំមុន។
នេះបើយោងតាមប្រជាជន សម្ព័ន្ធក្រុមហ៊ុនផលិត និងអ្នកលក់រាយ ការលក់សរុបរបស់សហរដ្ឋអាមេរិក ទាំងតាមប្រព័ន្ធអ៊ីនធើណេត និងក្នុងហាងបានកើនឡើង ៨១ ភាគរយពីមួយឆ្នាំទៅមួយឆ្នាំស្មើនឹង ១,១ ពាន់លានដុល្លារអាមេរិក (៩៥៧ លានអឺរ៉ូ) ។
ប៉ុន្តែបន្ថែមពីលើតម្រូវការរបស់អតិថិជន ការបិទប្រទេសក៏បានបង្កអោយមានការលំបាកដល់ក្រុមហ៊ុនផលិតអ៊ឺរ៉ុប និងអាមេរិកក្នុងការទទួលបានគ្រឿងបន្លាស់ផងដែរ។
លោក Moreno Fioravanti អគ្គលេខាធិការនៃសមាគមអ្នកផលិតកង់អឺរ៉ុប (EBMA) បានអោយដឹងថា ឧស្សាហកម្មនេះបានបាត់បង់ការផលិតគ្រឿងបន្លាស់អស់រយៈពេល ៣ ខែ ហើយស្តុករបស់យើងត្រូវបានប្រើប្រាស់ក្នុងរយៈពេលតែពីរខែប៉ុណ្ណោះ។
លោក Pancho Pimentel ប្រធានផ្នែកទីផ្សារនៃ Summit Bicycles ដែលមានហាងចំនួនប្រាំនៅរដ្ឋកាលីហ្វ័រញ៉ាបានមាននិយាយថា៖ «មានកង្វះខាតគ្រប់ទីកន្លែង ចាប់ពីម៉ាក់កង់រហូតដល់ផ្នែកផ្សេងៗនៃកង់» ។ លោកបន្តថា ការជិះកង់គឺជា ដំណើរការចេញពីបណ្តាញផ្គត់ផ្គង់ពិភពលោកដែលត្រូវបានរំខានដោយជំងឺរាតត្បាតកូវីដ-១៩ ហើយផលប៉ះពាល់របស់វាត្រូវបានគេមើលឃើញនៅគ្រប់ប្រភេទទាំងអស់»។
ក្រុមហ៊ុន Giant ដែលជាក្រុមហ៊ុនផលិតឈានមុខគេរបស់ពិភពលោក មានមូលដ្ឋាននៅកោះតៃវ៉ាន បានឃើញ ការលក់របស់ខ្លួននៅអឺរ៉ុបកើនឡើង ១៤០ ភាគរយពីមួយឆ្នាំទៅមួយឆ្នាំនៅក្នុងខែមិថុនា ដែលជំរុញជាពិសេសការលក់កង់អេឡិចត្រូនិច។
បញ្ជាទិញគឺពេញរហូតដល់ពាក់កណ្តាលឆ្នាំក្រោយ ហើយវាមានសុទិដ្ឋិនិយមស្រដៀងគ្នាសម្រាប់ឆមាសទី ២ ។ ទោះយ៉ាងណា លោក Manuel Marsilio អគ្គនាយករបស់ក្រុមហ៊ុន CONEBI បាននិយាយថា កង្វះកង់មិនអាក្រក់ដូចមនុស្សមួយចំនួនបានលើកឡើងនោះទេ។
លោកបន្តថា៖ «មានការខ្វះខាតខ្លះដោយសារតែការជាប់គាំងរយៈពេល ២ ខែ…ផលិតកម្មរបស់អឺរ៉ុបត្រូវបានបញ្ឈប់»។
ប៉ុន្តែឧស្សាហកម្មកង់របស់យើងកំពុងធ្វើការយ៉ាងខ្លាំងដើម្បីបំពេញចន្លោះ។ វាជារឿងវិជ្ជមានមួយដែលយើងមានអ្នកផលិតខ្នាតតូច និងមធ្យមជាច្រើននៅទូទាំងទ្វីបអឺរ៉ុបដែលមានភាពបត់បែនខ្លាំង។
លោកបន្ថែមថា៖ «អ្នកផលិតអ៊ឺរ៉ុបភាគច្រើននឹងបន្តធ្វើការផងដែរនៅក្នុងខែកក្កដា និងសីហា ដូច្នេះវានឹងមិនបញ្ឈប់នៅរដូវក្តៅទេ»។ ក្នុងពេលនេះដែរ អតិថិជននឹងត្រូវទិញកង់ដែលមានតម្លៃថ្លៃជាងមុន ឬរង់ចាំការផលិត៕
ប្រែសម្រួលដោយ សៀវ គួយអ៊ី