ព្រះសង្ឃចំនួន ២៦ អង្គបានឆ្លងជំងឺគ្រុនឈីក និងផ្តាសាយធំ
Publié le 17 Septembre 2020
Khann Chanvirak / Khmer Times
September 16,2020
ព្រះសង្ឃចំនួន ២៦ អង្គនៅស្រុកមង្គលបូរី ខេត្តបន្ទាយមានជ័យបានធ្លាក់ខ្លួនឈឺ ហើយត្រូវបានគេសង្ស័យថាឆ្លងជំងឺគ្រុនឈីក និងផ្តាសាយធំ។
លោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យ បាននិយាយថា ការផ្ទុះឡើងនេះបានកើតឡើងនៅក្នុងវត្តបឹងត្រស់ ភូមិបឹងត្រស់ ឃុំភ្នំតូច នៅពេលដែលព្រះសង្ឃ ១៣ អង្គត្រូវបានបញ្ជូនទៅមន្ទីរពេទ្យបង្អែកថ្មគោលថ្ងៃនេះ ដោយសារគ្រុនក្តៅ ឈឺក្បាល និងវិលមុខ។
លោកបានបន្តថាព្រះសង្ឃ ១៣ អង្គផ្សេងទៀតមកពីវត្តតែមួយក៏ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកមង្គលបូរីដែរ។
លោកថា៖ «មន្រ្តីមន្ទីរសុខាភិបាលខេត្ដបានទៅមន្ទីរពេទ្យ ដើម្បីពិនិត្យនិងយកសំណាកឈាមសម្រាប់តេស្តជំងឺគ្រុនឈីក ហើយនៅព្រឹកថ្ងៃស្អែកយើងអាចធ្វើតេស្តឈាមទាំងនេះ សម្រាប់ជំងឺកូវីដ-១៩ ផងដែរ ក្នុងករណីមានគ្រុនក្តៅជាប់រហូត»។
លោកបន្ថែមថា វាអាចជាជំងឺផ្តាសាយធំ ឬគ្រុនឈីក ខណៈដែលមន្ត្រីសុខាភិបាលកំពុងឃ្លាំមើលសុខភាពរបស់ពួកគេ។
ក្រសួងសុខាភិបាលបានអំពាវនាវដល់អភិបាលខេត្តទាំងអស់ទូទាំងប្រទេស ត្រូវមានវិធានការសុខភាពតឹងរឹង ដើម្បីការពារការឆ្លងជំងឺ គ្រុនផ្តាសាយធំ និងវីរុសផ្សេងៗក្នុងឱកាសបុណ្យភ្ជុំបិណ្ឌ។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានក្រើនរំលឹកដល់អភិបាលខេត្តទាំងអស់ត្រូវបន្តសង្កេតមើលការអនុវត្តវិធានការសុខភាពឱ្យបានត្រឹមត្រូវ។
លោកថា៖ «ក្រសួងបានកត់សំគាល់ករណីនៃការឆ្លងជំងឺផ្តាសាយធំនៅតាមវត្ត ដូចជាតាកែវ ត្បូងឃ្មុំ និងបាត់ដំបង។ ជំងឺផ្តាសាយបានធ្វើឱ្យព្រះសង្ឃ និងពុទ្ធបរិស័ទជាច្រើនឈឺ ដោយមានសីតុណ្ហភាពលើសពី ៣៧,៥ អង្សាសេ ក្អក និងហៀរសំបោរ»។
លោកបានបន្តថា៖ «វាចាំបាច់ត្រូវពាក់ម៉ាស់ នៅពេលពួកគេចូលវត្ត ឬជួបអ្នកកាន់សាសនាផ្សេង និងដើម្បីរក្សាគម្លាតសង្គមយ៉ាងហោចណាស់មួយម៉ែត្រកន្លះ»។
កាលពីម្សិលមិញ មានការរាយការណ៍ថាមនុស្សចំនួន ៤៦ នាក់មានសីតុណ្ហភាពលើសពី ៣៧,៥ អង្សាសេ បានបង្ហាញរោគសញ្ញាដូចជំងឺផ្តាសាយ និងមានហៀរសំបោររយៈពេល ៦ ថ្ងៃនៅខេត្តបាត់ដំបង។
ពួកគេបានមកពីខេត្តមួយចំនួនផ្សេងទៀត ដើម្បីមកសិក្សានៅសាលាពុទ្ធសាសនាមួយនៅវត្តស្វាយដង្គុំ ក្នុងស្រុកឯកភ្នំ។
លោកស្រី ឳ វ៉ាន់ឌិន អ្នកនាំពាក្យក្រសួងសុខាភិបាល បានអោយដឹងថាអ្នកជំងឺថ្មីចំនួន ៤៦ នាក់ទទួលបានលទ្ធផលតេស្តអវិជ្ជមានសម្រាប់ជំងឺកូវីដ-១៩ ។ ប្រែសម្រួលដោយ សៀវ គួយអ៊ី