អង្គការក្រៅរដ្ឋាភិបាលចង់បានការគាំទ្របន្ថែមសម្រាប់ស្ត្រីក្នុងវិស័យកម្សាន្ត

Publié le 7 Septembre 2020

សែន ដាវីត / Khmer Times

អង្គការក្រៅរដ្ឋាភិបាលចំនួន ៥ ដែលធ្វើការដើម្បីការពារស្ត្រីបានដាក់ចេញនូវរបាយការណ៍ស្រាវជ្រាវមួយកាលពីម្សិលមិញ ស្តីពីផលប៉ះពាល់នៃជំងឺកូវីត ១៩ ទៅលើស្ត្រីធ្វើការក្នុងវិស័យកំសាន្តដែលបានបង្ហាញថា ពួកគេខ្លះកំពុងជួបបញ្ហាលំបាកដោយសារប្រាក់ចំណូលរបស់ពួកគេធ្លាក់ចុះយ៉ាងខ្លាំង។

តំណាងអង្គការក្រៅរដ្ឋាភិបាលនានា រួមបណ្តាញស្ត្រីការងារស្ត្រីរួបរួមគ្នា (WNU) មជ្ឈមណ្ឌលព័ត៌មានកម្មករ (WIC) សកម្មភាពសង្គមដើម្បីសហគមន៍និងការអភិវឌ្ឍ (SACD) ក្រុមតន្ត្រីMessenger Band និងបណ្តាញមូលដ្ឋានកម្ពុជា សកម្មភាពប្រជាជនដើម្បីការអភិវឌ្ឍន៍ (PAD) បានមានវត្តមាននៅក្នុងការសម្ភោធរបាយការណ៍នេះ។

ពួកគេបានបង្ហាញលទ្ធផលនៃការវាយតំលៃផលប៉ះពាល់ និងការស្ទង់មតិនៅក្នុងសហគមន៍មូលដ្ឋាន។ គោលបំណងគឺដើម្បីជំរុញការគាំទ្រ និងអន្តរាគមន៍ជាបន្ទាន់ដល់នារីធ្វើការផ្នែកកំសាន្ត ដែលបានបាត់បង់ប្រាក់ចំណូល ក៏ដូចជាជួយសម្រួលដល់ការប្រាស្រ័យទាក់ទងរវាងពលរដ្ឋ និងអ្នកពាក់ព័ន្ធ។

ការសិក្សានេះបានសម្ភាសអ្នកធ្វើការក្នុងវិស័យកំសាន្តចំនួន ១៣០ នាក់នៅរាជធានីភ្នំពេញ ខេត្តបន្ទាយមានជ័យ និងខេត្តកណ្តាល។

អ្នកផ្តល់បទសមា្ភសចំនួន ៩៣ ភាគរយបាននិយាយថា កូវីត -១៩ កំពុងជះឥទ្ធិពលដល់ប្រាក់ចំណូលរបស់ពួកគា ត់ដោយសារតែការបាត់បង់ការងារ និងការព្យួរការងារ។

ការសិក្សាបានរកឃើញថាអ្នកផ្តល់ចម្លើយ ៤៥ ភាគរយបាននិយាយថាពួកគេខ្វះសន្តិសុខស្បៀង និង ៧១,៥៤ ភាគរយនិយាយថា ពួកគេជំពាក់បំណុលដោយសារជំងឺកូវីត-១៩ ។

លោកស្រី លី វីណា មកពីអង្គការបណ្តាញស្ត្រីការងារស្ត្រីរួបរួមគ្នា បាននិយាយថាស្ត្រីទាំងនោះបានអំពាវនាវដល់រដ្ឋាភិបាលឱ្យជួយពួកគេដោយផ្តល់ប្រាក់ឧបត្ថម្ភមួយចំនួន ដើម្បីជួយក្នុងថ្លៃជួលផ្ទះ ថ្លៃអគ្គិសនី និងថ្លៃទឹក។

បណ្តាញស្ត្រីការងារស្ត្រីរួបរួមគ្នាស្នើសុំឲ្យ ម្ចាស់ផ្ទះកាត់បន្ថយថ្លៃឈ្នួលរបស់ពួកគាត់យ៉ាងតិច ៥០ ភាគរយ ហើយម្ចាស់កន្លែងកម្សាន្តផ្តល់ប្រាក់ផ្គត់ផ្គង់ដល់កម្មករដែលផ្អាកការងាររបស់ពួកគេ។

លោកស្រី លី វីណា និយាយថា៖ «ប្រសិនបើកូវីត ១៩ នៅតែបន្ត កម្មករកំសាន្តនឹងប្រឈមមុខនឹងស្ថានភាពធ្ងន់ធ្ងរជាងនេះ។ ពួកគេប្រឈមនឹងការបាត់បង់ការងារ គ្មានប្រាក់ចំណូល និងជំពាក់បំណុលគេ»។

លោកស្រីបានបន្ថែមថា ពួកគេមួយចំនួនបានចាកចេញពីទីក្រុងដើម្បីទៅផ្ទះគ្រួសាររបស់ពួកគេនៅស្រុកកំណើរ។

កាលពីខែមិថុនា ក្រុមកម្មករក្នុងវិស័យកំសាន្តបានស្នើសុំទៅក្រសួងការងារ ក្រសួងកិច្ចការនារី និងប្រធានក្រុមប្រឹក្សាចំនួន ៣ ដងដើម្បីផ្តល់ប្រាក់ចំនួន ៤០ ដុល្លារសម្រាប់ការព្យួរពីការងារប៉ុន្តែសំណើរបស់ពួកគាត់ត្រូវបានបដិសេធ។

ការស្នើសុំរបស់ក្រុមស្ត្រី ធ្វើឡើងបន្ទាប់ពីរដ្ឋាភិបាលបានបញ្ជាឱ្យបិទ KTV និងក្លិបរាត្រីដើម្បីទប់ស្កាត់ការរីករាលដាលនៃជំងឺកូវីត១៩ ។

រដ្ឋមន្ត្រីក្រសួងការងារលោក អ៊ិត សំហេង បានចេញលិខិតមួយទៅក្រុមស្ត្រី ដោយលើកទឹកចិត្តឱ្យពួកគេស្វែងរកការងារថ្មី។ ក្រសួងក៏បានថ្លែងផងដែរ ថារដ្ឋាភិបាលមានកញ្ចប់ឧបត្ថម្ភធនរួចហើយសម្រាប់គ្រួសារដែលរងផលប៉ះពាល់យ៉ាងធ្ងន់ធ្ងរដោយជំងឺរាតត្បាតកូវីត-១៩ ។

កញ្ញា ពៅ ចំរ៉ុង ជាបុគ្គលិកក្នុងវិស័យកំសាន្តមួយរូបនិយាយថា រដ្ឋាភិបាលបានអនុញ្ញាតឱ្យ KTV និងកន្លែងកម្សាន្តបើកជាភោជនីយដ្ឋានឡើងវិញ។

កញ្ញាបាននិយាយថា៖ «ខ្ញុំបានបាត់បង់ការងារនិងប្រាក់ចំណូល ហើយខ្ញុំសង្ឃឹមថាជំងឺកូវីត១៩ នឹងចប់ឆាប់ៗនេះ »។

ប្រែសម្រួលដោយ៖ ហួន ឌីណា